على ورقة ورد
على وَرَقِة وَرْدْ ملفوفة بوَرَقِة وَرْدْ ملفوفة بوَرَقِة وَرْدْ
رُحْت ارسم بكلّ الحب
حلم جميل ومتعافى
بلون الشمس لون دافى
ومتضّفر أمل صافى ... بطعم الشهد
وضحكة قلب ماهو حزين
ولسة جنين
بيحِبى ع الطريق الاخضر .. بقاله سنين
ومستنى نهار العمر .. لـَجْل يشد
ونجمة ليل
بتتعانِق مع المواويل
تنّور ضلمة العتمة
ولجْل النور مايبقى دليل .. يعدِّينا لـِبـَرّ الوِد
على ورقة ورد ملفوفة بورقة ورد ملفوفة بورقة ورد
وقلت ارسم قمر وناس
يلاغى قلوبنا بالإحساس
ينور ع الطريق للناس
ويُبـْدر ضيه فوق الخد
وفارس فى الهوى خيَّال
مِنْ صَبْرُه يمِدّ حبال
وسيفه الحق والكلمة .. ولابيخاف من الأهوال
بحنانه الجبال تتهد
على ورقة ورد ملفوفة بورقة ورد ملفوفة بورقة ورد
فضلت ارسم كمان وكمان
حنين وحنان .. وتر وكمان
ونغمة حب تملانى .. وحُضن أمان
يدفينى فى جُوفِ البرد
وشَطّ يوشوش الموجة اللى مشتاقة
لنسمة طيف .. وليلة صيف
بتغزل كل أفراحنا ... تفرَّحنا
بلحظة صدق مايشوبْها سواد الزيف
ومن غير سَدّ
على ورقة ورد ملفوفة بورقة ورد ملفوفة بورقة ورد
جَتْ نقطة ندى نادية .. على غفلة
بلا إنذار
مَسَحِتْ كل رسماتى مع الأسرار
سابتنى ف نار
أمد كفوفى حوالية مالاقى الرد
على ورقة ورد ملفوفة بورقة ورد ملفوفة بورقة ورد
صَبَحِتْ حروف الورد دبلانة
بقت أفراحى رافضانى وعاصيانة
وبسمة فجرى مبتورة .. ومكسورة
وأحزانى تفوق الحد
صِحيت وفقت م الأوهام ... وم الأحلام
أتارى الحلم كان زيــي بيحلم بالأمل بسَّام
وفجأة الحلم غافلنى .. وسابنى لخوفى والأيام
تجَرَّحْنِى .. وتدْبحْنِى .. بشوك الورد
على ورقة ورد ملفوفة بورقة ورد ملفوفة بورقة ورد
موضوع: على ورقة ورد 
الخميس 17 يونيو 2010, 10:43 pm
